Өфөлә һәм республикала киҫкен респиратор вирус инфекциялары буйынса хәл бөгөнгә тотороҡло. Был хаҡта Роспотребнадзорҙың Башҡортостан буйынса идаралығы етәксеһе урынбаҫары Галина Пермина мэриялағы оператив кәңәшмәлә хәбәр итте.

Г. Пермина әйтеүенсә, ҡалала йәйге каникулдан һуң ойошторолған коллективтар барлыҡҡа килеүгә бәйле сирҙең миҙгелле күтәрелеүе күҙәтелә.
Уҙған аҙнала баш ҡалала 8 меңдән ашыу сир осрағы теркәлгән, 45 проценты - балалар. Башлыса грипп булмаған этиологиялы вирустар теркәлә.
Бөтә донъя һаулыҡ һаҡлау ойошмаһы фараздарына ярашлы, ағымдағы эпидемия миҙгелендә A(H1N1) Мissouri штаммы, A(H3N2) (Darwin штаммы) һәм В (Tokyo) гриппы вирустары циркуляцияһы көтөлә. Был штамдарҙың барыһы ла быйылғы вакциналарҙың яңыртылған составына индерелгән.
Вакцинаның төп партияһы федераль бюджет аҡсаһы иҫәбенә республикаға ағымдағы аҙнала килә. 1 миллион 700 мең доза вакцина килеүе көтөлә. Өҫтәмә рәүештә республика бюджеты иҫәбенә 3,5 мең доза "Гриппол" препараты һатып алынды. Тәү сиратта вакцина балаларға, йөклө ҡатындарға, 60 йәштән өлкәндәргә, хроник сирле кешеләргә, шулай уҡ медицина һәм мәғариф ойошмалары хеҙмәткәрҙәренә һалына. Эш биреүселәргә хеҙмәткәрҙәрҙе үҙ иҫәбенә һалдырыуҙы ойошторорға кәңәш ителә.
Вакцинация өсөн иң ҡулай ваҡыт: сентябрь-ноябрь. Күп йыллыҡ күҙәтеүҙәр буйынса, эпидемиологик күтәрелеш декабрҙә башлана, ә грипп һәм ОРВИ менән сирләүҙең иң юғары нөктәһе ғинуар һәм февралгә тура килә. Галина Пермина биналарҙа оптималь температура режимын үтәү, дезинфекция сараларын ҡулланып даими йыуыу һәм һауаны зарарһыҙландырыу кеүек иҫкәртеү сараларын иҫкә төшөрҙө.

"Киске Өфө" гәзите, №39, 2 - 8 октябрь 2026 йыл

КИРЕ СЫҒЫРҒА