Бына биш йыл инде республикала "Атайсал" проекты бойомға ашырыла, ул йәмәғәтселеккә тыуған төйәкте ярата белеүебеҙҙе һәм уның хаҡында хәстәрлек күрә алыуыбыҙҙы бик күп миҫалдарҙа иҫбат итте.

Көҙ көнө, проекттың әүҙем фазаһы тамамланғас, бөтә активистарҙы изге эштәре өсөн рәхмәт белдереү һәм республикала тормошто тағы ла яҡшыраҡ итеү юлдары тураһында бергәләп фекер алышыу өсөн ҙур форумға йыйыу йолаһы бар. Үткән аҙнала Өфөлә 5-се тапҡыр үткәрелде "Атайсал" проектының "Ватан көсө" форумы. Күләмле сараға меңдән ашыу ҡатнашыусы: меценаттар, ирекмәндәр, Махсус хәрби операция геройҙары, әүҙем йәштәр һәм Рәсәйҙең төрлө төбәктәрендә йәшәгән яҡташтарыбыҙ йыйылды. Программала пленар дискуссиялар, биҙәү-ҡулланма сәнғәте күргәҙмәләре, милли кейем көнө уңайынан этномода күрһәтеү, асыҡ лекциялар һәм түңәрәк өҫтәлдәр планлаштырылғайны. Эш һигеҙ тематик майҙансыҡта ойошторолдо. Ҡатнашыусылар яҡташлыҡты нығытыу, МХО-ла ҡатнашыусыларға ярҙам итеү, мәҙәни кодты һәм туған телде һаҡлау, шулай уҡ урындағы башланғыстарҙы һәм йәштәр потенциалын үҫтереү мәсьәләләрен тикшерҙе. Был темалар йәмғиәтте республиканың дөйөм киләсәге өсөн берләштереүгә йүнәлтелгән дә инде.
Билдәләнеүенсә, "Атайсал" проекты 2021 йылдан Башҡортостан Республикаһы Башлығы Радий Хәбиров башланғысы буйынса тормошҡа ашырыла. Проекттың маҡсаты ябай: республикала һәм унан ситтә йәшәгән һәр кем тыуған төйәгенә ярҙам итә ала. Мәҫәлән, шишмәне, паркты төҙөкләндереү, обелиск ҡуйыу, сиркәү йәки мәсет төҙөү, һәләтле уҡыусылар өсөн премия булдырыу. Бер һүҙ менән әйткәндә, Башҡортостандың һәр мөйөшөндә "бәләкәй генә изге эштәр шишмәләре" ағып сығырға тейеш ине. Әммә ағымдар шул тиклем көслө булып сыҡты, улар ҙур океанға әүерелде. "Атайсал" беҙҙең уртаҡ берҙәмлектең сағылышына әйләнде.
Проектты башлап ебәргәндән алып ҡатнашыусылар дөйөм суммаһы 2 миллиард һумдан ашыу тәшкил иткән 40 меңдән ашыу башланғысты тормошҡа ашырған. Әле проектта ҡатнашыусылар 8 меңдән ашыу. МХО яугирҙарына ярҙам буйынса 6 меңгә яҡын проект; социаль объекттарға ярҙам күрһәтеү буйынса 5 меңдән ашыу проект ғәмәлгә ашырылған; 1,3 меңдән ашыу балалар һәм спорт майҙансыҡтары йыһазландырылған; 500-ҙән ашыу мәсет һәм сиркәү төҙөлгән һәм ремонтланған; меңгә яҡын зыярат, 2 меңдән күберәк һәйкәл һәм обелиск тәртипкә килтерелгән; 1 меңдән ашыу шишмә төҙөкләндерелгән; 16 меңдән күберәк мөһим саралар үткәрелгән.
Махсус хәрби операция башланыу менән яугирҙарға ярҙам "Атайсал"дың төп йүнәлештәренең береһенә әүерелде. Меценаттар һәм ирекмәндәр был йүнәлештә 5,5 меңдән ашыу проектты тормошҡа ашырған. Мәҫәлән, Баймаҡ эшҡыуары Руслан Сәғәҙиев алғы һыҙыҡтағы яугирҙарға гуманитар йөктәр ебәреүҙә ҡатнашыу өсөн Урал аръяғы эшҡыуарҙарын берләштергән. Ярҙам шулай уҡ Луганскиҙың социаль учреждениеларына, шул иҫәптән Красный Луч ҡалаһының "Барвинок" балалар баҡсаһына һәм Петровский мәктәп-интернатына йүнәлтелә.
Республикала бындай миҫалдар бихисап. "Атайсал"да ҡатнашыусылар Радий Хәбировтың "Барыһы ла Еңеү өсөн" тигән саҡырыуын ишетте һәм яугирҙарыбыҙ өсөн ышаныслы тыл булыу өсөн мөмкин булғандың барыһын да эшләй. Проектта ҡатнашыу өсөн юғары статусҡа һәм ҙур финанс мөмкинлектәренә эйә булыу мотлаҡ түгел. Һәр кем көсөнән килгәнсә ярҙам итергә мөмкин. Башҡортостан Хөкүмәтенең беренсе вице-премьеры Урал Килсенбаев әйтеүенсә, "Атайсал" проекты стереотиптарҙы емерә һәм тәрән хис-тойғоларға - мөхәббәткә һәм илһөйәрлеккә ҡоролған. Ул шуның менән үҙенсәлекле. Беҙ барыбыҙ ҙа Ватаныбыҙ һағында торабыҙ..."

"Киске Өфө" гәзите, №36, 18 - 24 сентябрь 2026 йыл

КИРЕ СЫҒЫРҒА