Республикала ойошторолған ике тапҡыр Советтар Союзы Геройы Муса Гәрәев исемендәге пилотһыҙ системалар ғәскәрҙәре батальонына тәүге контрактсылар юлланды ла инде, тип хәбәр итә Башҡортостан Башлығының РФ Милли гвардияһы ғәскәрҙәре менән үҙ-ара эш итеү буйынса кәңәшсеһе Артур Йомағужин. Уның һүҙҙәренсә, тәүге бер аҙнала подразделение сафына ун ир-егет яҙылған. Улар уҡырға ил төбәктәренең береһендә урынлашҡан полигонға йүнәлгән.

Офицер билдәләүенсә, батальонға һайлап алғанда буласаҡ һалдаттарҙың һаулығына, физик хәленә һәм, әлбиттә, үҙе әйтеүенсә, башты эшләтә белеүҙәренә айырым иғтибар бүленә. Виртуаль алышта уңышҡа өлгәшеү өсөн тиҙ реакция, үткер аҡыл һәм үҫешкән моторика кәрәк, ти ул.
- Йәштәр бушты бушҡа ауҙарып ваҡыт үткәрә, тиҙәр. Күреүебеҙсә, улар Ватанға ҡаһарманлыҡ менән хеҙмәт итә лә белә. Яҡшы яҡҡа үҙгәрә йәштәребеҙ. Ғорурланыр өсөн урын бар. БПЛА операторы өсөн идеаль йәш - 25 йәшкә тиклем. Быны алыш яланы тәжрибәһе күрһәтә. Был осорҙа улар етеҙерәк, аралашыу өсөн үҙ "теле" бар. Аҡыллыраҡтар, үҙгәрештәрҙе тиҙ эләктереп алалар. Үҙҙәренең идеялары менән киләләр фронтҡа һәм алғы һыҙыҡтағылар менән уртаҡлашалар. Өйҙә нисектәрҙер инде, әммә МХО-ла - патриоттар һәм геройҙар, - тип билдәләй Артур Йомағужин.
Батальонда хеҙмәткә 35 йәштән 45 йәшкә тиклемге ир-егеттәрҙе лә көтәләр икән. Улар водитель, механик, электрик була ала, тип өҫтәй Башҡортостан Башлығы кәңәшсеһе.
- Батальон яҡташлыҡ мөнәсәбәттәре нигеҙендә төҙөлә. Уның төп көсө, нигеҙе - Башҡортостан халҡы. Ләкин беҙ башҡа төбәктәрҙә йәшәүселәрҙе лә ҡабул итәбеҙ. Йәшәгән урының түгел, ә иптәшеңдең ышаныслы яурыны мөһим. Әгәр дөйөм эшкә көс бирергә әҙер булһаң һәм һайлап алыуҙы үтһәң, ҙур команданың бер өлөшө була алаһың, - ти ул.
Башҡортостанда төҙөлгән батальондар тәүге көндәрҙән үк Махсус хәрби операция биләмәләрендә үҙҙәрен лайыҡлы күрһәтә. Уларға тылдың ныҡ булыуы, республика халҡының даими ярҙамы көс бирә. Хеҙмәткәрҙәргә МХО-ла ҡатнашыусыларға һәм уларҙың ғаиләләренә тәғәйен барлыҡ дәүләт ярҙам саралары, льготалар һәм социаль гарантиялар ҡаралған.
Муса Гәрәев исемендәге башҡорт пилотһыҙ системалар батальонына яҙылыу өсөн Өфө ҡалаһы, Октябрь революцияһы урамы, 3 адресы буйынса мөрәжәғәт итергә кәрәк. Шулай уҡ бөтә ҡыҙыҡһындырған мәғлүмәтте: +7 908 358 0000, +7 995 948 6541 номерҙары буйынса ла алырға мөмкин.

Ҡасим ҒӘҘЕЛШИН әҙерләне.
"Киске Өфө" гәзите, №34, 28 август - 3 сентябрь 2026 йыл

КИРЕ СЫҒЫРҒА