Һорау: "Йәй мәле - ял мәле бит инде. Ошо мәлде кем нисек үткәрә икән?"

Әнисә ИБРАҺИМОВА, Дәүләкән районы, уҡытыусы: Ниһайәт, сығарылыш уҡыусыларына ғына түгел, мәктәптең бөтөн педагогтар коллективы өсөн дә көсөргәнешле, тулҡынландырғыс имтихандар осоро имен генә үтеп тә китте һәм беҙгә лә ял итеп алыу форсаты тыуҙы. Мин быйылғы отпускамды айырыуса көтөп алдым, сөнки ҡыш аҙағы - яҙ башында грипп менән ныҡ ҡына сырхап алырға тура килде. Үкенескә, уның эҙемтәләре йәйгә тиклем һуҙылды: хәлһеҙлек, йүтәл өйәнәге, баш ауыртыу кеүек билдәләр юҡ-юҡта үҙен һиҙҙерә тора, шуға күрә дауалаусы табип кәңәшенә ҡолаҡ һалып, быйыл диңгеҙ тарафтарынан баш тартырға һәм үҙебеҙҙең Башҡортостан санаторийҙарының береһен һайларға булдым. Тәүҙә был ниәт башҡа ла инеп сыҡмай ине, бәхеткә, минең хәл-әхүәл менән хәбәрҙар булған әхирәтем үҙе йәшәгән ҡалалағы ана шундай ял-дауаланыу учреждениеһына путевка һатып алып, тыуған көнөмә бүләк иткәс, ҡыуанып риза булдым. Ҡайҙа, тиһегеҙме? Шул инде: үҙебеҙҙең ҡунаҡсыл, киң күңелле халҡы менән дан тотҡан Баймаҡ, Сибай яҡтарына юлланам! Әхирәтем менән Сибай ҡалаһынан ситтәрәк урынлашҡан "Урал аръяғы шифаханаһы"нда ял итәсәкбеҙ. Ял менән бергә бында һауыҡтырыу саралары ла бик шәп ойошторолған, тип маҡтай әхирәтем, сөнки ул ике йыл элек ошо шифаханала булып, бик ҡәнәғәт ҡалған. Тик ул миңә бер аҙна алдараҡ килергә ҡушты: үҙенең Баймаҡ районындағы тыуған ауылында булып, Талҡаҫ күлен, Ғәҙелша шарлауығын күрһәтергә теләй. Һәм иң мөһиме - Мөжәүир хәҙрәттең тыуған ауылында булып, уның ҡәберенә зыярат ҡылырға тигән изге ниәтебеҙҙе башҡарыу теләге лә бар. Бындай мөғжизә бүләк иткәне өсөн әхирәтемә мең рәхмәтлемен. Биш көндән юлға сығам!

Илдар ӘХМӘТШИН, Стәрлетамаҡ ҡалаһы, эшҡыуар: Быйыл йәйге ялды тулыһынса балаларыбыҙға арнарға хәл иттек, юғиһә, йыл да ауылға, ҡартатай менән өләсәйҙәренә ҡайтарып ҡуя инек. Эйе, ауылда саф һауа, таҙа ризыҡ - ҡаланың һөрөмлө һауаһынан һуң ай буйы ял күҙгә күренерлек файҙа бирә, әлбиттә. Икенсенән, ҡартатай менән өләсәйгә баҡса уташып, йәшелсә-емеш тиреп, нығынып ҡайта балалар. Быйыл ҡыҙыбыҙ Айгөлгә - 12, улыбыҙ Маратҡа 9 йәш тулды. Ауылда ни тиклем генә һәйбәт булмаһын, хәҙер уларҙы бер төрлөлөк ялҡытып та китә. Улар төрлө ерҙәрҙә булырға, сәйәхәт ҡылырға теләйҙәр. Унан бит ҡартатай менән өләсәйҙәргә лә ял кәрәк, ләкин улар өсөн иң яҡшы ял, әлбиттә, яратҡан ейән-ейәнсәрҙәренең яндарында булыуы. Ошоға тиклем өс йыл рәттән отпускамды файҙалана алмағанлыҡтан, балалар әсәләре менән ауылда ла ял иттеләр, "Ҡарағай" шифаханаһында ла булдылар, Торатауға ла барып ҡайттылар. Быйыл, ниһайәт, ғаиләм менән диңгеҙ буйында бергәләп ял итергә форсат тыуҙы: Төркиәнең Антальялағы курортына ике аҙналык путевка алдыҡ. Балаларҙы сыныҡтырыу өсөн диңгеҙ һыуы менән һауаһы бик файҙалы, ә Төркиәнең Урта диңгеҙ һыуы тап ана шундай сифаттарға эйә: шифалы тоҙҙар һәм фитонцидтар менән туйындырылған диңгеҙ һауаһы тын юлдары системаһын таҙарта, тире ауырыуҙарын дауалай. Улыбыҙ дерматит менән яфалана, уға диңгеҙ һауаһы-һыуы килешер, тип өмөт итәбеҙ.

Тимур МУСИН, Өфө ҡалаһы, юрист: Беҙҙе "өс таған" тип йөрөтәләр һәм был, ысынлап та, шулай: мәктәптә уҡыған йылдарҙан бергәбеҙ. Дуҫтарымдың береһе - программист Рөстәм, икенсеһе - Рәмил һөнәрселек колледжында уҡыта, мастер. Беҙгә 25-әр йәш, әле башлы-күҙле булып өлгөрмәгәнбеҙ, шуға күрә, кем белә, бәлки, ғаилә хәлдәре үҙгәреп тә китер - беҙ быйыл йәйге ялыбыҙҙың бер аҙнаһын бергәләп, палатка ҡороп, тәбиғәт ҡосағында ысын мәғәнәһендә буйҙаҡтарса ял итергә булдыҡ. Бының өсөн Марат дуҫыбыҙ беҙҙе үҙенең тыуған районы Учалыға барырға күндереҙе: бында беҙ Өргөн күле буйында һыу инеп, балыҡ ҡармаҡлап, ҡырҙа ятып ял итергә ниәтләнек. Башҡортостандың легендар күлдәренең береһе булған Өргөн хаҡында бик күп ишеткәнем бар, әлбиттә, ләкин, күпте ишеткәнсе, бер тапҡыр барып күреүең - үҙе бер ғүмер, ти Марат. Уның һөйләүенсә, Өргөн - үҙенсәлекле тәбиғәт ҡомартҡыһы, уның дөйөм майҙаны 9,2 кв.км һәм ул республикабыҙҙың тәбиғәт хазиналары Ҡандракүл, Асылыкүл менән Сыбаркүлдән ҡала ҙурлығы буйынса дүртенсе урында тора. Был һыу ятҡылығының майҙанын урыны менән урман, ташлы-ҡырсынлы дала һәм һаҙлыҡ уратып алған. Тәбиғи, бындай урынды һәр төрлө йәнлектәр, ҡош-ҡорт төйәк иткән. Ә балыҡтың кәм тигәндә тиҫтәләп төрө үрсей икән Өргөндә! Ошондай тәбиғәт ынйылары - күл һәм йылғалары, тау-ҡаялары, мәмерйәләре булған Башҡортостанда ял - үҙе бер мөғжизә. Таиланды ла, Төркиәһе лә ары торһон!

Фирүзә ИШБИРҘИНА яҙып алды.
"Киске Өфө" гәзите, №26, 3 - 9 июль 2026 йыл

КИРЕ СЫҒЫРҒА