Ә был хәүеф миҙгеленә ҡарамай, йыл әйләнәһенә була торғаны. Ә шулай ҙа янғындар граждандарҙан йәйге осорҙа бигерәк тә һаҡ, йыйнаҡ булыуҙы талап итә. Шәхси йорт тирә-яғындағы ғына түгел, ялан-урмандарҙағы ут ҡабыуҙар бигерәк тә ҡурҡыныс тыуҙыра икәнен һәр кем иҫтә тоторға тейеш.

Бына әлеге ваҡытта республикала 3-4-се класлы янғын хәүефе фаразлана. Шуға бәйле урман янғындарын һүндереү бүлектәре юғары әҙерлек режимына күсерелде, тип хәбәр иттеләр республиканың Урман хужалығы министрлығынан. "Урман фондын күҙәтеү көсәйтелде, ерҙә патрулдәр арттырылды", - тип асыҡлыҡ индерҙеләр ведомствола. Республикала йәшәүселәрҙе урманға барғанда иғтибарлы булырға һәм ут сығыуға юл ҡуймау өсөн янғын хәүефһеҙлеге ҡағиҙәләрен үтәргә саҡыралар. Урманда, ялан-ҡырҙа усаҡ яғыу тыйыла. Урманда янғын хәүефһеҙлеге ҡағиҙәләрен боҙған өсөн граждандарға - 60 мең һумға, вазифа биләгән кешеләргә - 110 мең һумға, ә ойошмаларға 2 миллион һумға тиклем штраф һалына, тип иҫкә төшөрҙөләр ведомствола. Урманда йәки ялан-ҡырҙарҙа төтөн йәки ут сыҡҡаны асыҡланған осраҡта 8 (347) 218-14-14 номеры буйынса Башҡортостан Урман хужалығы министрлығының диспетчер хеҙмәтенә хәбәр итергә кәрәк.

"Киске Өфө" гәзите, №20, 22 - 28 май 2026 йыл

КИРЕ СЫҒЫРҒА