Башҡортостан шашкасылары Өфөлә үткән Рәсәй чемпионатында яҡшы һөҙөмтә күрһәтте.

Башҡортостан шашкасылары 18 мөмкинлектән 10 награда, шул иҫәптән дүрт алтын, өс көмөш һәм шул уҡ һанда бронза миҙал яуланы. Ир-егеттәр турнирында призлы пъедесталды Башҡортостан шашкасылары Айнур Шәйбәков, Александр Георгиев һәм Марсель Шәрәфетдинов яуланы. Ҡатын-ҡыҙҙар араһында ете тапҡыр донъя чемпионы Тамара Танһыҡҡужина еңеүсе булды. Уның турнирҙың туғыҙынсы партияһында еңеүе былтырғы Рәсәй чемпионы Сандаара Апросимованы мәрәйҙәр буйынса ҡыуып етеп, өҫтәмә критерийҙар буйынса уны уҙып китергә мөмкинлек бирҙе. Легендар спортсы ошо классик программала туғыҙынсы тапҡыр Рәсәй чемпионы титулын яуланы.
Ярыштың һуңғы көнөндә Башҡортостандан 10 тапҡыр донъя чемпионы Александр Георгиев һәм Яҡутстандан рус шашкаһы буйынса донъя Һәм Европа чемпионы Тунаара Федорова "алтын" яуланы. "Көмөш" миҙалға блицта һәм рапидта дүрт тапҡыр донъя чемпионы, алты тапҡыр Рәсәй чемпионы Айгөл Иҙрисова (Башҡортостан) һәм ике тапҡыр Европа чемпионаты призеры, биш тапҡыр Рәсәй чемпионы Андрей Калмаков (Тверь өлкәһе) лайыҡ булды. "Бронза"ны Илья Дериглазов (Удмурт Республикаһы) һәм 2024 йылда Рәсәйҙең абсолют чемпионы, рус шашкаһы буйынса донъя һәм Европа чемпионы Сандаара Апросимова (Яҡутстан) яуланы.
Ярышта илдең 14 төбәгенән 72 спортсы, шул иҫәптән 12 гроссмейстер һәм 18 спорт мастеры ҡатнашты. Улар Башҡортостандың баш ҡалаһына Мәскәүҙән һәм Санкт-Петербургтан, Красноярск крайынан, Донецк Халыҡ Республикаһынан, Удмуртиянан, Яҡутстандан, шулай уҡ Брянск, Кемерово, Мәскәү, Нижегородка, Свердловск, Тверь һәм Төмән өлкәләренән килде. Турнир һөҙөмтәләре буйынса 2025 йылдың ноябрендә үтәсәк донъя һәм Европа чемпионатына Рәсәй йыйылма командаһы ойошторолдо.

"Киске Өфө" гәзите, №32, 15 - 21 июль 2025 йыл

КИРЕ СЫҒЫРҒА